गुड फ्राइडे सिनेमा
चिनियाँ निर्देशकमध्ये निरन्तरता र चर्चाका हिसाबले सबभन्दा अगाडि आउने नाम हो झांग यिमो। चीनको फिल्मलाई पहिलोपटक अस्करमा पुर्याउने श्रेय उनलाई जान्छ।
विदेशी भाषातर्फको उत्कृष्ट फिल्म विधामा उनका फिल्महरूले पटक पटक अस्करका लागि प्रतिस्पर्धा गरेका छन्।
यसपटक गुड फ्राइडे सिनेमामा हामीले उनै झांग योमुको फिल्म सिफारिस गरेका छौं जुन युट्युबमा सबटाइटल सहित हेर्न सकिन्छ।
जीजिविषाबारे संसारभर धेरै उत्कृष्ट फिल्म बनेका छन्। तीमध्ये एउटा सशक्त र सुन्दर फिल्म हो, 'टु लिभ'।
यसले कान फिल्म फेस्टिभलमा तीन वटा अवार्ड जितेको थियो। त्यस्तै एउटा बाफ्टा अवार्ड पनि जितेको थियो। यसबाहेक अन्य थुप्रै अन्तर्राष्ट्रिय महोत्सव र अवार्डहरूमा यसले उल्लेख्य स्थान हासिल गरेको थियो।
समीक्षक र दर्शक दुवैले मनपराएका यो फिल्मलाई द न्यूयोर्क टाइम्सले अहिलेसम्म बनेका उत्कृष्ट एक हजार फिल्मको सूचीमा राखेको छ। टाइम आउटले सय उत्कृष्ट चिनियाँ फिल्ममा यसलाई समावेश गरेको छ।
सिएनएनले हालसम्मकै १८ उत्कृष्ट एसियन फिल्मको सूचीमा 'टु लिभ' लाई समावेश गरेको छ। त्यस्तै बिबिसीको सय उत्कृष्ट विदेशी भाषी फिल्मको सूचीमा ४१ औं नम्बरमा परेको छ। यो सूचीका लागि ४३ देशका १०९ समीक्षकहरूले भोट दिएका थिए।
यो फिल्मका मुख्य पात्र यति निर्दोष छन्, जस्तासुकै विपदमा पनि बिथोलिन्छन्, हतासिन्छन् तर जीवनदेखि हार मान्दैनन्।
जुवाडी फुगीले एकएक गर्दै जुवामा घरसमेत हार्छन्। यही घटना उसको बुबाको मृत्युको कारक बन्छ। उसकी श्रीमतीले पनि छोडेर जान्छिन्।
सडकमा सामान बेच्न थालेपछि उनी आफूले घर सुम्पेको मान्छेसँग नगद सापटी माग्न जान्छन्। तर ती मान्छेले उनलाई पैसाको साटो 'स्याडो पपेट' दिँदै भन्छ, यो पैसाभन्दा अझ काम लाग्छ। आफ्नो लागि आफै कमाऊ।’
फुगीले कहिल्यै जुवा नखेल्ने भन्दै श्रीमती र छोराछोरीसँग बस्न थालेपछि यही स्याडो पपेटद्वारा जीविका चलाउने हुन्छ। यी पात्रलाई केन्द्रमा राखिए पनि फिल्ममा तत्कालीन समयको राजनीतिक घटनाक्रम यी पात्रभन्दा बलियो भएर आइदिन्छ।
झांगका अरू फिल्मजस्तै यसमा पनि केही दशकसम्मको समय कैद छ। फिल्ममा चीनमा गृहयुद्ध भएको समयदेखि कम्युनिस्ट नेता माओको सांस्कृतिक क्रान्तिसम्मको चरणका सन्दर्भ आएका छन्।
फुगी, उनकी श्रीमती जियाझेन र उनका सन्तानले गृहयुद्धदेखि सांस्कृतिकसम्मको चरणमा पुग्दासम्म विभिन्न कुरा पाउँछन् र गुमाउँछन्। यो परिवारको कथा मार्फत निर्देशकले आफ्नै आँखाले देखेका राजनीतिक र सामाजिक परवर्तनका असर मनछुने गरी पर्दामा उतारेका छन्।
गतिशील समयको कथालाई फिल्ममा पनि जीवन्त रूपमा भन्न सक्नु निर्देशकको विशेषता हो। चाहे सयौं मान्छेको गतिविधि उतार्न परोस् वा एउटै पात्रको संवेदना देखाउन, निर्देशकले त्यसलाई मज्जाले उतार्न सकेका छन्।
हेर्नुहोस् अंग्रेजी सबटाइटल सहित युट्युबमाः
