बैंकिङ प्रणालीबाट नेपाल राष्ट्र बैंकले ५० अर्ब रूपैयाँ तरलता खिच्ने भएको छ।
बैंकहरूले कर्जा लगानी गरेर उब्रिएको रकम राष्ट्र बैंकमा राख्छन्।
मंगलबारसम्म बैंकहरूले राष्ट्र बैंकमा राखेको दुई खर्ब ३३ अर्ब रूपैयाँ प्रणालीमा फर्कन बाँकी छ। राष्ट्र बैंकमा बैंकहरूले यसअघि राखेको माघ १० गते राखेको ६० अर्ब परिपक्व भएर आजै बैंकिङ प्रणालीमा फर्किदैछ।
बैंकहरूले कर्जा लगानी बढाउन नसकेमा यसरी उब्रिएको रकम राष्ट्र बैंकमा राख्छन्। यसै अन्तर्गत राष्ट्र बैंकले बुधबार बैंकहरूबाट २१ दिनको लागि ५० अर्ब रूपैयाँ तान्न लागेको हो।
पछिल्लो समय बैंकहरूको कर्जा लगानीमा विस्तार भइरहेकोले राष्ट्र बैंकले तान्न खोजेकोभन्दा कम रकम बैंकहरूले राखिरहेका छन्। गत फागुन ४ गतेदेखि नै राष्ट्र बैंकले तान्न लागेको भन्दा कम रकम बैंकहरूले राखिरहेका हुन्।
कर्जा लगानी बढ्न थालेकोले यसरी राष्ट्र बैंकले तान्न लागेको भन्दा कम रकम बैंकहरूले राखिरहेको देखिन्छ।
फागुन ४ गते ४० अर्ब तान्न थाल्दा बैंकहरूले ३३ अर्ब १५ करोड, फागुन ६ गते पनि ४० अर्ब तान्न थाल्दा बैंकहरूले १० अर्ब ४० करोड र फागुन ११ गते ३० अर्ब तान्न थाल्दा १६ अर्ब २० करोड राखेका थिए।
त्यस्तै, फागुन १३ गते २५ अर्ब तान्न थाल्दा नौ अर्ब ८० करोड र फागुन १८ मा पनि २५ अर्ब तान्न थाल्दा १४ अर्ब ७० करोड राखेका थिए।
केही महिनाअघि बैंकहरूले राष्ट्र बैंकमा राखेको रकम चार खर्बसम्म पुगेकोमा अहिले दुई खर्ब ३३ अर्ब हाराहारी मात्रै छ।
बैंकहरूले राष्ट्र बैंकमा राख्ने रकममा ब्याजदर पनि बढी माग्न थालेका छन्। यसरी रकम राख्दा २.८९ प्रतिशतसम्म ब्याजदर पाइरहेकोमा अन्तिम तीन पटकदेखि औसत ३ प्रतिशत ब्याजदर मागिरहेका हुन्।
