नेकपा एमाले मोरङको १० औं अधिवेशन यसपटक दुई कारणले बढी चर्चामा रह्यो।
पहिलो, यति बेला एमाले अधिवेशन मोरङमा मात्रै भएको थियो। त्यसैले आम एमालेजनको ध्यान स्वाभाविक रूपमा मोरङ केन्द्रित थियो।
मोरङ अधिवेशनले योभन्दा पनि बढी चर्चा पाउने दोस्रो कारण चाहिँ — मोरङ एमालेमा यसपटक पार्टी अध्यक्षसमेत रहेका प्रधानमन्त्री केपी शर्मा ओलीसहित उनी पक्षका सबै नेता एकातिर र पछिल्लो समय ओली समूहबाट टाढिएका मोरङकै नेता विनोद ढकाल अर्कातिर थिए।
बुधबार भएको चुनावमा कोशीबाट केन्द्रमा प्रतिनिधित्व गर्ने सबै नेता राजकुमार ओझाको पक्षमा उभिएका थिए।
यसअघि प्रदेश अध्यक्षमा पराजित ढकालले भने अजम्बर राई नेतृत्वमा अलग्गै प्यानल बनाएका थिए। शुक्रबार साँझ पदाधिकारीहरूको मत गणना सकिएर अन्तिम परिणाम आउँदा अध्यक्ष, उपाध्यक्ष, सचिव र दुई उपसचिव सबै पदमा ढकाल पक्षका उम्मेदवारहरू विजयी बनेका छन्। जस अनुसार संस्थापन पक्षका उम्मेदवारहरूलाई पराजित गर्दै ढकाल पक्षका उम्मेदवारहरू निर्वाचित बनेका हुन्।
शुक्रबार साँझ सकिएको पदाधिकारी तर्फको मत गणनाको अन्तिम परिणाम अनुसार ढकाल पक्षका अध्यक्षका उम्मेदवार राईले ४४६ मत पाउँदै जित हासिल गरेका हुन्। उनले संस्थापन पक्षका राजकुमार ओझालाई पराजित गरेका हुन्। ओझाले ४०७ मत पाएका छन्।
उपाध्यक्षमा ढकाल पक्षका सागर थापा निर्वाचित भएका छन्। सागरले ४२२ मत पाउँदा संस्थापनकी शान्ति लिम्बूले ३९१ मत पाएकी छन्।
गएको जेठमा सागर थापालाई पार्टीको साधारण सदस्यसमेत नरहने गरी कारबाही गर्ने कमिटीमा लिम्बू संयोजक थिइन्। कार्यकर्ताले भने कारबाही गर्ने लिम्बूलाई पराजित गर्दै सागरलाई पुरस्कृत गरेका छन्।
सचिवमा ढकाल पक्षका सोमराज थापा विजयी भए। उनले ४६२ मत पाएका छन्। संस्थापनका रवीन थापाले ३६८ मत पाएका छन्। उपसचिवमा सन्तोष वान्तावा ४९० मत पाएर विजयी भएका छन्। संस्थापनका इरजालाल राजवंशीले ३११ मत पाएका छन्।
उपसचिवमा उषा झा विजयी भएकी छन्। उनले ४१८ र संस्थापनकी शिल्पा कार्कीले ४०५ मत पाएकी छन्। उपसचिवमा पराजित कार्की विराटनगरकी उपमेयर हुन्। चुनावको अघिल्लो दिन मात्रै ढकाल प्यानल छाडेर संस्थापन समूहमा गएकी कार्कीलाई जिसस उपप्रमुख झाले पराजित गरेकी हुन्।
अध्यक्ष केपी शर्मा ओली र उनका समूहका सबैजसो नेता र विनोद ढकाल समूहबीचको प्रतिस्पर्धामा परिणत भएको निर्वाचनले मोरङ एमालेमा ढकाललाई शक्तिमा फर्काएको छ। ऋषिकेश पोखरेल अध्यक्ष हुँदा ढकाल किनारामा परेका थिए।
कुनै बेला ओलीका विश्वास पात्र मानिने विनोद ढकाल पूर्वको पार्टी संगठनमा माधव नेपालको जगजगी हुँदा ओली पक्षका एक मात्रै स्तम्भजस्तो मानिन्थे। समयक्रममा उनै ढकाल यति बेला ओली र उनको टिमका नेताहरूसँग एक्लै भिड्ने विन्दुमा आइपुगेका थिए। अन्ततः ढकाल पक्षले चाहे जस्तै नतिजा मोरङमा आएको छ।
यसको सुरूआत २०८० असोजमा भएको प्रदेश अधिवेशनबाट भएको थियो। त्यस बेला ढकाल केन्द्रीय सदस्य थिए। तर उनले प्रदेश अध्यक्ष दाबी गरे। ओली टिममा रहेका कोशीका नेताहरू गुरू बराल, शेरधन राई, भानुभक्त ढकाल, हिक्मत कार्की लगायतले घनश्याम खतिवडालाई अघि सारिसकेका थिए।
२०७४ सालमा शेरधन राई मुख्यमन्त्री बनेपछि एकै टिममा भएर पनि ढकालको राई र कार्कीहरूसँग सम्बन्ध चिसिएको थियो। सोही कारण नेताहरूले कुनै बेला माधव नेपाल निकट रहेका खतिवडालाई च्यापे। आफ्नो टिमका नेताहरूले साथ दिएका खतिवडालाई अध्यक्ष ओलीले पनि समर्थन गरे। प्रदेशमा ढकाल हारे, खतिवडा जिते। त्यही बेलादेखि ओली र उनको टिमसँग एक्लै भिडिरहेका ढकाल जिल्ला अधिवेशनमा आइपुग्दा पनि भिड्ने योजनासहित टिम लिएर मैदानमा थिए।
एमाले नेताहरू गुरू बराल, शेरधन राई, भानुभक्त ढकाल, हिक्मत कार्की लगायतका नेताहरू ओलीले राजकुमार ओझालाई अध्यक्ष बनाउन भन्नुभएको छ भन्दै कार्यकर्ता फकाइरहेका थिए।
उद्घाटन कार्यक्रममा पार्टी अध्यक्ष ओलीको सन्देश भन्दै उपाध्यक्ष रामबहादुर थापा 'बादल' ले उद्घाटन सत्रमा आएर 'गुटबन्दी सह्य नहुने' भन्दै सहमतिमा नेतृत्व चयन गर्न निर्देशन दिएका थिए। नेताहरूलाई उनले पनि ओझालाई अध्यक्ष बनाउन भनेका थिए।
उपाध्यक्ष गुरू बराल, उपमहासचिव प्रदीप ज्ञवाली, प्रदेश इन्चार्ज शेरधन राई, कोशीका मुख्यमन्त्री हिक्मत कार्की, प्रदेश अध्यक्ष घनश्याम खतिवडा, भानुभक्त ढकाल, ऋषिकेश पोखरेल सबैले सहमतिमा नेतृत्व छान्नुपर्ने भन्दै ओझाकै नाम अघि सारेका थिए।
जितपछि ढकाल पक्षका विजेता उम्मेदवारले नेताहरूले गरेको अन्याय कार्यकर्ताले उल्टाएको बताएका छन्।
'हामीलाई नेताहरूले अन्याय गरेका थिए, कार्यकर्ताले न्याय गरे,' उपाध्यक्ष जितेका सागर थापाले भने।
अध्यक्षमा निर्वाचित अजम्बर राईले पार्टी एकढिक्का बनाएर लैजाने प्रतिक्रिया दिए।
