पोखराको पृथ्वीनारायण क्याम्पसको स्वतन्त्र विद्यार्थी युनियन निर्वाचनमा नेकपा (एमाले) निकट अनेरास्ववियुको प्यानल नै निर्वाचित भएको छ।
पृथ्वीनारायण क्याम्पसको स्ववियु अध्यक्षमा अनेरास्ववियुका विष्णु पोखरेल ११०६ मत ल्याएर विजयी भए। उनका निकटतम प्रतिस्पर्धी नेपाल विद्यार्थी संघका सुशील न्यौपानले ५०३ मत ल्याए। स्वतन्त्र उम्मेदवार विप्लवी भट्टराईले ४६९ मत प्राप्त गरिन्।
अखिल क्रान्तिकारीका नवीन अधिकारीले २२३, संयुक्त प्यानलका सन्तोष पौडेलले १९६, अखिल छैठौंका मिलन सुनारले २८ मत ल्याए।
स्ववियु सचिवमा अनेरास्ववियुका विराट दुवाडी १४१४ मतसहित निर्वाचित भए। उनका निकटतम प्रतिस्पर्धी नेविसंघका विवेक भट्टराईले ६२८ मत ल्याए। अखिल क्रान्तिकारीका सचिवका उम्मेदवार मिराज थापा मगरले २९३ मत ल्याए।
कोषाध्यक्षमा एमालेनिकट अनेरास्ववियुका सन्दिका गुरूङ १३०५ मत ल्याएर निर्वाचित भइन्। प्रतिस्पर्धी नेविसंघकी अमिषा यादवले ६४७ मत ल्याइन्।
पिएन क्याम्पसमा चैत ५ गते नै स्ववियु निर्वाचन तय भएको थियो। तर मतपत्रमा अखिल छैठौंको मत संकेत गर्ने ठाउँमा कोष्ठक चिह्न नै नभेटिएपछि मतदान रोकिएको थियो।
आइतबार भएको मतदानमा २९८७ विद्यार्थीले मतदान गरेका थिए। देशकै ठूलो क्याम्पस पिएन क्याम्पसमा ९२७० जना विद्यार्थी अध्ययनरत छन्।
स्ववियुमा अध्यक्ष, सचिव र कोषाध्यक्षसहित ११ जना प्रत्यक्ष निर्वाचित हुन्छन्। उपाध्यक्ष, उपसचिव र ८ जना सदस्य समानुपातिक निर्वाचनबाट छनौट हुन्छ। २१ सदस्यीय स्ववियु समितिको अवधी २ वर्ष हुनेछ।
विगतमा पिएन क्याम्पसका स्ववियु सभापति बनेका विद्यार्थीहरू राज्यका विभिन्न ठाउँमा नेतृत्वदायी भूमिका खेलिसकेका छन्।
पिएनमा स्ववियु सभापति बनेका सोमनाथ अधिकारी ‘प्यासी’ कोशी प्रदेश प्रमुख र एमालेबाट सांसद भइसकेका छन्। एमाले नेता खगराज अधिकारी, स्वर्गीय नेता रविन्द्र अधिकारी र पदम गिरी पटक-पटक सांसद र मन्त्री भइसकेका छन्।
२०२१ सालमा पहिलो पटक सर्वसम्मत स्ववियु सभापति बनेका गणेश शेरचनदेखि अन्तिम पटक २०६५ सालमा सभापति बनेका रश्मी आचार्यसम्म २५ जना सभापति भइसकेका छन्। यसवीचमा पञ्चायतकालमा विद्यार्थी गतिविधि रोक्न तत्कालीन सरकारले स्ववियु निर्वाचन रोकेको थियो। २०३६ सालको विद्यार्थी आन्दोलनले फेरी स्ववियुलाई पुनर्स्थापित गरेको थियो।
