काठमाडौंको तीनकुने क्षेत्रमा शुक्रबार दिउँसो 'संयुक्त जनआन्दोलन समिति' का 'जनकमान्डर' दुर्गा प्रसाईं आह्वानमा प्रदर्शन भएको छ।
राजसंस्था पुनर्स्थापना, हिन्दु राष्ट्र पुनर्स्थापना र संघीयता खारेजीजस्ता एजेन्डासहित प्रसाईंले आह्वान गरेको प्रदर्शनमा नवराज सुवेदी नेतृत्वको 'संयुक्त जनआन्दोलन समिति' ले पनि समर्थन जनाएको छ।
साथै यो प्रदर्शनमा राप्रपा, राप्रपा नेपाललगायत राजसंस्था पुनर्स्थापनका एजेन्डा लिएका दलहरूले पनि समर्थन जनाएका छन्।
शुक्रबार बिहान करिब ११ बजेदेखि नै तीनकुने क्षेत्रमा राजावादीहरू भेला हुन थालेका थिए।
प्रहरीको घेरा तोड्न खोज्दा अश्रुग्यास र पानीका फोहरा
प्रहरीले प्रदर्शनकारीहरूलाई बल प्रयोग गरेको छ।
जिल्ला प्रशासन कार्यालय काठमाडौंले प्रसाईंलाई तीनकुने क्षेत्रमा कार्यक्रम गर्न अनुमति दिएको थियो।
तर प्रदर्शनकारीहरू प्रहरीको घेरा तोडेर शान्तिनगरबाट नयाँ बानेश्वरतर्फ अघि बढ्न खोजेपछि प्रहरीले अश्रुग्यास र पानीका फोहरा प्रहार गरेको हो।
प्रदर्शनकारीहरूले पनि प्रहरीलाई ढुंगा प्रहार गरेका थिए। प्रहरी र प्रदर्शनकारीबीच धकेलाधकेल पनि भएको छ। प्रहरीले लाठीचार्जसमेत गरेको छ।
स्थानीयको घरमा तोडफोड
तीनकुनेका तीन जना स्थानीयका घरमा तोडफोड भएको छ।
ती घरमा बसेर प्रहरीले अश्रुग्यास प्रहार गरेको भन्दै प्रदर्शनकारीहरूले ती घर तोडफोड गरेका हुन्। ती घरका घरधनीहरू को-को हुन् खुलिसकेको छैन भने तोडफोडमा संलग्नको पनि पहिचान भएको छैन।
घेरा तोड्न खोज्दा तितरबितर
प्रहरीले घेरा तोड्न खोजेका प्रदर्शनकारीलाई तितरबितर पारेको छ।
लाठीचार्ज, अश्रुग्यास र पानीका फोहरा हानेर प्रहरीले प्रदर्शनकारीलाई तितरबितर पारेको हो। प्रहरीले प्रदर्शनकारीलाई प्रदर्शन र सभाका लागि तोकिएको तीनकुने क्षेत्रमै बस्न आग्रह पनि गरेको छ।
संयमित हुन प्रसाईंको आग्रह
घेरा तोड्न प्रदर्शनकारी अघि बढेपछि संयमित हुन दुर्गा प्रसाईंले आग्रह गरेका छन्। उनले सभास्थलबाट प्रदर्शनकारीलाई सभा वरवर आउन अपिल गरेका छन्।
प्रदर्शनकारीहरूले पूर्वराजा ज्ञानेन्द्र शाहको फोटो र राष्ट्रिय झण्डासहित प्रदर्शन गरेका छन्। सभास्थलमा राखिएको ब्यानरमा भने पूर्वराजा शाह र प्रसाईंको फोटो राखिएको छ।
तर राप्रपालगायत दलका केही नेताहरूले प्रसाईंको मात्र फोटो राखेकोमा असन्तुष्टि जनाएका छन्। प्रसाईंले भने आफ्नो आह्वानमा शुक्रबारको कार्यक्रम राखिएको बताउँदै आएका छन्।
-1743150381.jpeg)
