काठमाडौं शुक्रबार मध्याह्नदेखि असान्त छ। गणतन्त्र पक्षधरहरूले अहिले रत्नपार्क, भद्रकाली, पद्मोदय मोडसम्म बाटै ढाक्ने गरी सभा गरिरहेका छन्।
उनीहरूले रत्नपार्क–भद्रकाली जाने मूल सडक नै छेकेर मञ्च बनाएका छन्।
उता राजावादीहरूले तीनकुने क्षेत्र अशान्त तुल्याएका छन्।
मेडिकल व्यवसायी दुर्गा प्रसाईंको नेतृत्वको प्रदर्शनमा सहभागी हुन राजावादीहरू शुक्रबार बिहान ११ बजेदेखि नै बानेश्वर, तीनकुने क्षेत्रमा भेला भएका थिए। उनीहरूले १२ बजेपछि सभा सुरू गर्ने बताएका थिए।
सभा सुरू हुनुअगावै उनीहरू निषेधित क्षेत्र तोड्न र प्रहरीसँग मुठभेड गर्न उद्यत भए।
प्रदर्शनकारीहरूको निशानामा निजी घर पनि परेका छन्। तीनकुने क्षेत्रमा प्रदर्शनकारीले एउटा घर क्षतविक्षत तुल्याएका छन्। लगत्तै उनीहरूले त्यही घरमा आगजनीसमेत गरे।
राजावादीको सभामा एक जना प्रदर्शनकारीले दुई तोलाको सिक्री हराएको बताएका छन्।
जुलुसतर्फ अघि बढ्दा आफूलाई पछाडिबाट थिच्दै घाँटीमा लगाइराखिएको सुनको सिक्री लुटिएको उनले बिलौना गरेका छन्।
‘झ्याप समाइहाल्यो घाँटीमा। पछाडिबाट। घाँटीमा समाइहाल्यो। लुटिहाल्यो त,’ उनले दुखेसो पोख्दै भनेका छन्।
प्रदर्शनमा सहभागी हुने क्रममा तीन लाखभन्दा माथि मूल्यको सुनको सिक्री लुटिएपछि रूनुबाहेक आफूसँग विकल्प नभएको उनले बताएका छन्।
सिक्री लुटिएका प्रदर्शनकारीको नाम खुलेको छैन। यद्यपि त्यही आन्दोलनमा सहभागी भएकाले जसले लुटेको हो उनले ‘शतिसनारायण नगेन्द्र’लाई सिक्री दिनु भनेको भिडियो अहिले सामाजिक सञ्जालमा देख्न सकिन्छ।
‘साढे दुई तोलाको सिक्री थियो। अब मैले कहाँबाट ल्याउने? घर कसरी जानु!,’ उनले रुँदै बिलौना गरेका छन्।
प्रहरीसँगको मुठभेड, निजी घरमा तोडफोड र आगजनीपछि राजावादीहरूको आन्दोलन तितरवितर बनेको छ।
राजावादीहरूको मञ्ज क्रमशः खाली हुँदै गएको छ।
