नेकपा (एकीकृत समाजवादी) का अध्यक्ष माधवकुमार नेपालले देशमा वंशको शासन फर्काउन खोज्नेहरुले ठूलो मूल्य चुकाउनुपर्ने बताएका छन्।
शुक्रबार काठमाडौंको भृकुटीमण्डपमा समाजवादी मोर्चाले आयोजना गरेको जनसभालाई सम्बोधन गर्दै अध्यक्ष नेपालले सार्वभौमसत्ता सम्पन्न नेपाली जनताले फेरि राजतन्त्र स्वीकार नगर्ने बताउँदै फर्काउन खोजिए ठूलो मूल्य चुकाउनुपर्ने बताएका हुन्।
'अब यो मुलुक इतिहासको पछाडी फर्किन सक्दैन । हामी जान दिँदैनौँ । हामी चुनौती दिन चाहन्छौँ यो देशमा फेरि ति वंशको साशन ल्याउन खोज्ने कसैले कुचेष्टा गर्छ भने उनीहरुले ठुलो मूल्य चुकाउनुपर्ने हुन्छ,’ उनले भने।
उनले सार्वभौम भइसकेका नेपालीहरू दासता स्वीकार गर्न तयार नभएको पनि बताए।
२४० वर्षको शाह वंशको शासन र १०४ वर्षको राणा शासनले नेपाली जनतालाई दास बनाएको भन्दै उनले अब नेपाली जनताले कसैको दासता स्वीकार नगर्ने बताए।
'देशलाई कति लुटे उनीहरुले ? देशलाई कति चुसे उनीहरुले देशलाई कसरी बरबाद पारे उनीहरुले । उनीहरुको एक एक घटनाक्रमलाई हामीले सम्झियौँ भने छर्लङ हुन सक्छौ कि राजतन्त्रले देशको भलो गरेको छैन । त्यसकारण राजतन्त्रतफै फर्किने कल्पनै नगरे हुन्छ,' उनले भने।
अध्यक्ष नेपालले जनताको समस्याबाट आफूहरु चिन्तित भएको बताउनु भयो । उहाँले पुँजीवादी व्यवस्था र सत्ता सञ्चालन गर्नेहरुको नालायकीपनका कारण जनताले दुःख पाएको बताए।
उनले नेपाली जनताका समस्या समाधानका लागि समाजवादी व्यवस्था आवश्यक भएको र नेपाली विशेषतासहितको समाजवादी प्रणालीको खाका आफूहरुसँग भएको दाबी गरे।
'दुर्भाग्य के छ भने सत्तामा बस्नेहरुले अग्रगामी विचार राखेनन् । यथास्थितिमा रुमल्लिए । उनीहरु परिवर्तनका पक्षधर देखिएनन् । आज हामीले त्यसैको भोगिरहेका छौँ परिणाम,' उनले भने।
