प्राध्यापक र विद्यार्थीहरूको आन्दोलनका कारण भैरहवास्थित कृषि तथा पशु विज्ञान अध्ययन संस्थान पक्लिहवा क्याम्पसको परीक्षा अनिश्चित बनेको छ।
एकातर्फ प्राध्यापकहरूले भेटेरिनरी अध्ययनलाई कृषिसरह मान्यता दिएर विश्वविद्यालयका पदाधिकारी र विशेष समितिमा नियुक्ति गरिनुपर्ने लगायतका माग राख्दै ‘पेन डाउन’ गरेका छन्। अर्कोतर्फ विद्यार्थीहरूले परीक्षा सञ्चालन गर्नुपर्ने माग गर्दै क्याम्पसमा तालाबन्दी गरेका छन्। जसले गर्दा क्याम्पसको पठनपाठन ठप्प मात्र भएको छैन, परीक्षा नै अनिश्चित बनेको छ।
पशु विज्ञान अध्ययन संकायलाई कृषि संकाय सरह मूलधारमा समेट्नु पर्ने लगायतका माग राख्दै प्राध्यापकहरूले विद्यार्थीलाई दिनुपर्ने आन्तरिक मूल्यांकनको नम्बर नै नदिए पछि विवाद उत्पन्न भएको थियो।
प्राध्यापकहरूले विद्यार्थीहरूलाई २० पूर्णाङ्कमा आधारित रहेर आन्तरिक मूल्यांकनको अंक दिनुपर्छ। आन्तरिक मूल्यांकनको अंक दिएपछि मात्र बल्ल वार्षिक परीक्षा हुने प्रावधान छ। तर, प्राध्यापकहरूले कृषितर्फका विद्यार्थीहरूलाई आन्तरिक मूल्यांकनको अंक दिएपनि भेटेरिनरीको अंक नदिएपछि विवाद उत्पन्न भएको हो।
क्याम्पसका भेटेरिनरीतर्फका प्राध्यापक डा.नारायण न्यौपानेले आफूहरूले गत साउनमा डिन समक्ष बुँदागत रूपमा माग राखेपनि अहिलेसम्म पूरा गर्नेतर्फ पहल नहुँदा बाध्य भएर आन्दोलन गर्नुपर्ने अवस्था आएको बताए।
न्यौपानेका अनुसार प्राध्यापकहरूले अध्ययन संस्थानका तीन जना डिनमध्ये एक जना भेटेरिनरीतर्फबाट नियुक्त हुनुपर्ने, संस्थानमा गठन हुने विशेष समितिमा भेटेरिनरी शिक्षक हुनुपर्ने, उत्तर पुस्तिका जाँच गर्ने जिम्मेवारी सम्बन्धित विज्ञलाई दिनुपर्ने, क्याम्पसमा रहेको भेटेरिनरी अस्पतालको संचालन व्यवस्थित गर्नुपर्ने र छुट्टै भेटेरिनरी क्याम्पस सञ्चालन गरिनुपर्ने माग राखेका छन्।
क्याम्पसमा कार्यरत १७ जना प्राध्यापकहरूले गत माघ ९ गतेदेखि ‘पेन डाउन’ गरेपछि क्याम्पसका शैक्षिक गतिविधिसँगै परीक्षा अनिश्चिततर्फ धकेलिएको छ। माग सुनुवाई नहुँदासम्म आन्तरिक मूल्यांकनको अंक नदिने भन्दै भेटेरिनरी संकायका प्राध्यापकहरूले पेन डाउन गरेपछि क्याम्पस प्रशासनले फागुन ९ गतेदेखि हुने भनिएको भेटेरिनरी तर्फको ९ औं सेमेस्टरको परीक्षा स्थगित गरिएको भन्दै फागुन ८ गते सूचना जारी गरेको थियो।
भेटेरिनरी संकायको परीक्षा स्थगित गरिएपनि कृषि संकाय तर्फको परीक्षा भने फागुन १३ गतेदेखि सुरू भएको थियो। एउटै क्याम्पसमा कृषितर्फको परीक्षा हुँदा आफूहरूको परीक्षा स्थगित भएपछि विद्यार्थीहरूले आफूहरूको परीक्षा सुरू नभए कृषि संकायको परीक्षा पनि रोक्नुपर्ने माग गर्दै परीक्षा शाखामा तालाबन्दी गरेका छन्।
जसले गर्दा कृषितर्फको पनि १३ गतेको पहिलो दिनको परीक्षा भएपनि बिहीबार देखिका परीक्षा भने स्थगित भएका छन्। क्याम्पस प्रमुख जन्मजय गैह्रेले प्राध्यापकहरूको पेन डाउन र विद्यार्थीहरूको तालाबन्दीका कारण बिहीबार देखिका परीक्षा स्थगित गरिएको जानकारी दिए।
‘विद्यार्थीहरूले लगाएको तालाबन्दी खोलेर परीक्षा संचालनका लागि हामीले पहल गरिरहेका छौं, प्राध्यापकहरूको माग बारे पनि डिन कार्यालयमा जानकारी गराएका छौं,’ उनले भने।
भेटेरिनरी संकायका विद्यार्थीहरूले आफूहरूको पनि परीक्षा निर्धारित समयमै गरिनुपर्ने माग गर्दै क्याम्पस प्रमुख, प्रशासन र परीक्षा शाखामा तालबन्दी गरेका छन्। विद्यार्थीहरूले क्याम्पस प्रमुखको कार्यकक्षमा तालाबन्दीपछि टाँसिएको विरोधपत्रमा विभिन्न विद्यार्थी संगठनले शिक्षक, क्याम्पस प्रशासन र डिन कार्यालयले आफूहरूको हित विपरित अडान लिँदै परीक्षाहरू अनिश्चितकालका लागि स्थगित गरेर भयंकर लापरवाही गरेको उल्लेख छ।
क्याम्पसका प्राध्यापकहरूले आफूहरूले गत साउनमा डिन समक्ष बुँदागत रूपमा माग राखेपनि अहिलेसम्म पूरा गर्नेतर्फ पहल नगरिएको आरोप लगाए। क्याम्पसका भेटेरिनरीतर्फका प्राध्यापक डा.नारायण न्यौपानेले आफूहरूले १० वर्षदेखि माग राख्दै आएपनि सुनुवाई नभएको बताए।
‘हामीले अहिले राखेका मागहरू १० वर्षदेखि राख्दै आएका माग हुन्, मागबारे डिन कार्यालय पुगेर काठमाडौंमा छलफल गरिसकेका छौं। त्यहाँ कुनै निचोड आएन,’ न्यौपानेले भने, ‘अब, हामी छलफलका लागि काठमाडौं जाँदैनौं। डिन भैरहवा आएर हाम्रा मागबारे लिखित प्रतिबद्धता गर्नुपर्छ,’ न्यौपानेले भने।
विद्यार्थीहरूको परीक्षा स्थगित हुँदा आफूहरूलाई पनि दुःख लागेको तर माग सम्बोधन नहुँदासम्म परीक्षा संचालन नहुने उनले बताए। उनले परीक्षा स्थगित हुँदा आफूहरुलाई पनि दुःख लागेको तर माग सम्बोधन नभए परीक्षा नहुने बताए।
पटक–पटक छलफल गर्दा पनि भेटेरिनरीतर्फका प्राध्यापकले आन्तरिक मूल्यांकनको नम्बर क्यापस प्रशासनलाई बुझाउन नमानेको क्याम्पस प्रमुख गैह्रे बताउँछन्।
परीक्षा स्थगित हुँदा भेटेरिनरी संकायतर्फ स्नातक दोस्रो, चौथो र नवौं सेमेस्टरका विद्यार्थीको भविष्य अनिश्चित भएको छ। यसको प्रभाव कृषि संकाय र पठनपाठमा समेत परेको छ। प्राध्यापकहरूकै पेन डाउन भएकाले आन्तरिक मूल्यांकनमा नम्बर काटिने डरले विद्यार्थीहरू खुलेर बोल्न सकेका छैनन्। परीक्षा र पठनपाठन ठप्प हुँदा क्याम्पस सुनसान छ।
प्राध्यापक र विद्यार्थीहरुको आन्दोलनका कारण हुनसक्ने सम्भावित दुर्घटनालाई मध्यनजर गर्दै क्याम्पसमा प्रहरीले सुरक्षा दिएको छ।
-1740737149.jpg)
