नागरिक सहभागितामा असल अभ्यास गर्ने विश्वभरका स्थानीय तथा प्रदेश सरकारबीचको अवार्ड प्रतियोगिताको अनलाइन भोटिङ खुला भएको छ।
स्पेनको इन्टरनेसनल अब्जरभेटरी अन पार्टिसिपेसन डेमोक्रेसी (ओआइडिपी) नामक संस्थाले अवार्डको लागि आवेदन माग गरेको थियो। आवेदन माग गरेपछि विश्वका ३७ देशका १३७ वटा स्थानीय र प्रदेश सरकारले आवेदन भरेका थिए।
आवेदन भरेको रूपन्देहीको तिलोत्तमा नगरपालिका १३७ वटा स्थानीय र प्रदेश सरकारबाट प्रारम्भिक छनोट गरिएका उत्कृष्ट ४० वटामा परेको थियो। प्रारम्भिक छनोटमा परेका ४० वटाबाट उत्कृष्ट छनोटका लागि अनलाइन भोटिङ खुला गरिएको हो।
फाइनल प्रतिस्पर्धाको लागि तिलोत्तमा नगरपालिका नेपालको मात्र नभई सार्क राष्ट्रहरूमध्येकै एकमात्र स्थानीय तहको रूपमा छनोटमा परेको हो।
प्रारम्भिक छनोटमा परेका ४० आवेदकबीच अनलाइनबाट गरिने भोट र निर्णायकले दिएको अंकको आधारमा अवार्ड विजेता घोषणा गरिने ओआइडिपीले जनाएको छ।
ओआइडिपीका अनुसार बिहीबारदेखि खुला गरिएको अनलाइन भोटिङ गर्ने कार्य मार्च २८ सम्म हुने छ। अनलाइन भोटिङपछि भोटिङको ५० र निर्णायकको ५० अंकको आधारमा अवार्ड विजेता घोषणा गरिने छ।
विजेतालाई अर्जेन्टिनाको कोर्डोबामा आगामी मे २१ देखि २३ सम्म हुने २४ औं ओआइडिपी सम्मेलनमा अवार्ड वितरण गरिने छ।
तत्कालीन नगरप्रमुख बासुदेव घिमिरेको अगुवाइमा तिलोत्तमा नगरपालिकाले २०७४ सालदेखि नगरवासीको बृहत् सहभागितामा सरसफाइ तथा हरियाली प्रवर्द्धन अभियान सञ्चालन गर्दै आएको थियो।
नगरपालिकाका पूर्वनगरप्रमुख तथा प्रतिनिधिसभा सदस्य बासुदेव घिमिरेले सरसफाइ तथा हरियाली प्रवर्द्धन अभियानलाई निरन्तर सञ्चालन गरेर तिलोत्तमा नगरपालिकालाई अन्तर्राष्ट्रिय अवार्डका लागि फाइनल प्रतिस्पर्धामा पुर्याउन सकिएको बताए।
उनले सरसफाइ तथा हरियाली प्रवर्द्धन अभियानलाई निरन्तरता दिएको वर्तमान जनप्रतिनिधि, कर्मचारी तथा नगरवासीप्रति आभार व्यक्त गरे।
नगरप्रमुख रामकृष्ण खाणले विगत ८ वर्षदेखि हरेक महिनाको १ र १५ गते नगरवासीको सहभागितामा सञ्चालन गरिएको नगर सरसफाइ तथा हरियाली प्रवर्द्धन अभियानकै कारण ओआइडिपी अवार्डको लागि तिलोत्तमा नगरपालिका अन्तिम प्रतिस्पर्धामा पुग्न सकेको बताए।
उनले अवार्डका लागि फाइनल प्रतिस्पर्धाका लागि छनोट हुनु नेपालकै गौरवको विषय भएको बताए।
नगरपालिकाका उपप्रमुख जगेश्वरी चौधरीले नगरपालिकाले सञ्चालन गरिरहेको सरसफाइ तथा हरियाली प्रवर्द्धन कार्यलाई निरन्तर अगाडि बढाउन थप हौसला मिलेको बताइन्।
उनले अनलाइन भोटिङ गरेर ओआइडिपी अवार्डको विजेता बनाउन पनि आग्रह गरिन्।
अनलाइन भोटिङ गर्ने हरेकले विभिन्न पाँचवटा विधामा भोटिङ गर्न सक्ने छन्। ओआइडिपीको नियम अनुसार एउटामात्र विधामा भोट दिए रद्द हुनेछ।
भोटिङ गर्न इच्छुकले ओआइडिपीको वेबसाइटमा गएर आफ्नो इमेल खाता बनाई इकोलोजिकल ट्रान्जिसन एण्ड इन्भारन्मेन्ट विधामा मत दिन सक्ने छन्। एउटामात्र विषयमा मत दिए रद्द हुने नियम छ।
