नेपालका अन्तर्राष्ट्रिय निर्णायक अशोक खड्काले विश्व वरीयत जी-२ बुल्गेरिया ओपनमा खेल सञ्चालन गर्ने भएका छन्।
विश्व तेक्वान्दो तथा बुल्गेरिया तेक्वान्दो फेडरेसन र बुल्गेरिया ओलम्पिक कमिटीको संयुक्त आयोजनामा हुने प्रतियोगिता आगामी मार्च १ देखि ३ तारिखसम्म बुल्गेरियाको सोफियामा हुँदैछ।
प्रतियोगिताका लागि खड्का बिहीबार साँझ त्यसतर्फ जानेछन्।
अन्तर्राष्ट्रिय निर्णायक खड्का ग्यारोगी तथा पुम्से दुवै विधामा निर्णायकको भूमिकामा रहनेछन्। खड्का नेपालका ग्यारोगी तथा पुम्स दुवै विधाका दोस्रो श्रेणीका अन्तर्राष्ट्रिय निर्णायक हुन्। उनी पारा रेफ्री कोर्ष गर्ने कम नेपाली तेक्वान्दोकर्मी मध्ये एक पनि हुन्।
बुल्गेरिया ओपनमा ओलम्पियन र विश्व च्याम्पियन खेलाडीहरूसमेत गरी करीब १७०० खेलाडीको सहभागिता रहनेछ।
तेक्वान्दो निर्णायकको रुपमा खड्काको यो तेस्रो बुल्गेरिया भ्रमण हो। यसअघि, सन् २०२२ मा भएको विश्व च्याम्पियन्सिप र सन् २०२३ मा आयोजित बुल्गेरिया ओपनमा रेफ्रीको भूमिका निर्वाह गर्न खड्का बुल्गेरिया पुगेका थिए।
टोकियो पारा ओलम्पिक र पेरिस ओलम्पिक क्याम्पमा समेत पर्न सफल भएका खड्काले ५० भन्दा बढी विश्व वरीयताका तेक्वान्दो प्रतियोगितामा निर्णायकको भूमिका निर्वाह गरिसकेका छन्।
युवा तथा खेलकुद मन्त्रालयबाट ‘उत्कृष्ट रेफ्री’का रूपमा सम्मानित भइसक्नुभएका खड्का नेप्लिज तेक्वान्दो एकेडेमीका अध्यक्ष समेत हुन्।
