प्रथम गोर्खाली रग्बी सेभेन्स प्रतियोगितामा गोर्खा रग्बी क्लब, त्रिभुवन आर्मी क्लब, कर्णाली प्रदेश र सशश्त्र प्रहरी बलको एपीएफ सेमिफाइनलमा प्रवेश गरेका छन्।
भरतपुरको कृष्णपुर खेल मैदानमा शुक्रवार भएको लिग चरणको खेलपछि लुम्विनी प्रदेश, मधेस प्रदेश र गण्डकी प्रदेश लिग चरणबाटै बाहिरियो।
क्लबले आयोजना गरेको यो पहिलो रग्बी सेभेन्स प्रतियोगिता हो। विदेशी खेलाडीहरुको उपस्थितिले प्रतियोगिताको रौनक निकै वढेको देखिएको छ।
कुल ७ टोली बिच दुई समुहमा विभाजन गरी खेलाइएको प्रतियोगितामा समुह ए मा आयोजक गोर्खाली र कर्णाली प्रदेश सेमिफाइनलमा प्रवेश गर्यो। गोर्खा रग्बीले लिगको दुबै खेल जितेर र समुह विजेता बनेको थियो।
गोर्खालीले गण्डकी प्रदेशलाई २२–० ले तथा कर्णाली प्रदेशलाई २२–७ स्कोरले पराजित गरेको थियो। कर्णालीले भने गण्डकी प्रदेशलाई २६–५ स्कोरले पराजित गरी समुह उपविजेता बनेको थियो।
यस्तै समुह बी मा त्रिभुवन आर्मी क्लबले लिगको तीनवटै खेल जित्दै समुह विजेता बन्न सफल भयो।
टोलीले एपीएफलाई ३४– ५ स्कोरले, लुम्विनी प्रदेशलाई एकोहोरो खेलमा ४३–० ले तथा मधेश प्रदेशलाई पनि ४३–० स्कोरले पराजित गरेको थियो।
समुह उपविजेता बनेको एपीएफले भने मधेश प्रदेशलाई २४–५ ले तथा लुम्विनी प्रदेशलाई ४५–० ले पराजित गरेर उपविजेता बन्यो।
मधेश प्रदेशले लुम्विनी प्रदेशलाई २४–७ ले पराजित गर्दा लुम्विनीले भने लिगको तीनवटै खेल गुमाएको थियो।
अब शनिवार हुने सेमीफाइनलमा गोर्खाली रग्बीले एपीएफ संग र त्रिभुवन आर्मी क्लबले कर्णाली प्रदेश संग खेल्नेछ। शनिवार नै उपाधि भिडन्त हुनेछ।
यसअघि प्रतियोगिताको बाग्मती प्रदेशका साँसद इश्वर सापकोटा ‘सुमन’ ले ट्रफी अनावरण गर्दै उद्घाटन गर्नु भएको थियो। उनले नेपालमा रग्बी खेल तीब्र रुपमा अगाडि वढिरहेको बताउनुहुंदै स्थानीय तहमा यसको प्रभाव राम्रो पर्न थालेको बताउनुभयो।
कार्यक्रमका सभापति गोर्खाली रग्बी क्लबका अध्यक्ष रोहित कार्कीले आगामी वर्ष प्रतियोगितालाई अन्तर्राष्ट्रिय स्वरुप दिने बताउनुभयो।
कार्यक्रममा नेपाल रग्बी संघका महासचिव गोविन्द घिमिरेले रग्बीको स्तर निकै बृद्धि भएको बताउनु हुंदै अर्को वर्ष आयोजना हुने १४ औं दक्षिण एसियाली खेलकुदमा पदक जित्ने विश्वास ब्यक्त गर्नुभयो ।
प्रतियोगिताको विजेता टोलीले नगद रु २ लाख तथा दोस्रो स्थान प्राप्त गर्ने टोलीले रु १ लाख पुरस्कार प्राप्त गर्नेछ । नेपाली रग्बी प्रतियोगितामा राखिएको यो अहिले सम्मकै सर्वाधिक पुरस्कार राशी भएको आयोजकले जनाएको छ ।
