पोखरामा शनिबार सम्पन्न प्रथम गण्डकी राष्ट्रिय फेन्सिङ च्याम्पियनसिपमा विभागिय टोली नेपाल आर्मीको त्रिभुवन क्लब र आयोजक गण्डकी प्रदेश टिम च्याम्पियन भएको छ ।
गण्डकी प्रदेश फेन्सिङ संघ र कास्की जिल्ला फेन्सिङ संघको संयूक्त आयोजना तथा नेपाल फेन्सिङ संघको प्राविधिक सहयोगमा सम्पन्न प्रतियोगितामा नेपाल आर्मी.सिनियरतर्फ र गण्डकी प्रदेश जुनियरतर्फ टिम च्याम्पियन बनेका हुन् । प्रतियोगितामा सिनियरतर्फ नेपाल आर्मी हावी हुँदा जुनियरतर्फ गण्डकीले सर्वाधिक पदक जित्न सफल रह्यो । फेन्सिङ खेलको इतिहासमा गण्डकी पहिलो पटक जुनियर च्याम्पियन भएको हो ।
नेपाल आर्मी. ६ स्वर्ण, ४ रजत र ५ काश्य पदकसहित टिम सिनियरतर्फ टिम च्याम्पियन भएको हो भने गण्डकी ४ स्वर्ण, ३ रजत ९ काश्य पदकका साथ जुनियरतर्फ टिम च्याम्पियन बनेको छ ।
शनिबार सम्पन्न सीनियर पुरूष फोइल इन्डिभिजुअलतर्फ नेपाल आर्मीका बीर सिंहले स्वर्ण पदक हात पार्दा नेपाल आर्मीकै मिन कार्कीले रजत पदकमा चित्त बुझाए । त्यस्तै सुदुर पश्चिमका लक्ष्य शाही र आर्मीका नरेन्द्र धामीले काश्य पदक जिते ।
त्यस्तै सीनियर महिला फोइल इन्डिभिजुअलतर्फ बागमतीकी गोमा आचार्यले स्वर्ण पदक हात पारेकी छन् । उनले फाइनलमा नेपाल आर्मीकी रमा सिंहलाई पराजित गरिन् भने नेपाल आर्मीका खेलाडी द्वय आशा कुमारी गुरुङ र मनीषा थापाले काश्य पदक जिते ।
यता जूनियर पुरुष इपीतर्फ गण्डकीले सानदार खेल प्रदर्शन गर्दै सचिन खत्रीले स्वर्ण पदक जिते । सुदुर पश्चिमका भरत देव विरुद्ध फाइनलमा भिडन्त गरेका सचिनले पहिलो राउण्ड गुमाए पनि दोस्रो र तेस्रो राउण्डमा कम व्याक गर्दै भरतलाई काश्य पदकमा सिमित गरे । सोही स्पर्धामा सुदुर पश्चिमका प्रवीण शाह र गण्डकीका प्रशान्त गुरुङले काश्य पदक जिते ।
यसै गरी जूनियर महिला इपी इन्डिभिजुलको फाइनलमा गण्डकीकी निती खाँड सुदुर पश्चिमकी नितीषा भण्डारी संग पराजित भइन् । निकै प्रतिस्पर्धात्मक खेलमा नितीषाले स्वर्ण पदक जित्दै आयोजक टिमकी नितीलाई रजत पदकमा चित्त बुझाउन बाध्य पारिन् । सोही स्पर्धामा दुबै काश्य पदक भने गण्डकीले हात पार्न सफल भयो । गण्डककीका लागि रिसिका कँडेल र अपेक्षा पौडेलले कायश्य पदक जिते ।
गण्डकीले जुनियर इपी टिम इभेन्टमा उत्कृष्ट प्रदर्शन गर्दै स्वर्ण पदक हात पारेको छ । सो स्पर्धामा बागमतीले रजत पदक जित्दा सुदुर पश्चिमले काश्य पदक जित्न सफल भयो ।
सम्पन्न प्रतियोगिताको फोइल टिम इभेन्ट सिनियर पुरूषतर्फ स्पर्धामा आर्मीले स्वर्ण, एपिएफ क्लबले रजत र सुदुर पश्चिम र गण्डकीले काश्य पदक जितेका छन् भने महिलातर्फ नेपाल आर्मीले स्वर्ण, बागमती प्रदेशले रजत तथा गण्डकी र एपिएफले काश्य पदक जिते ।
बिजेता टिम तथा खेलाडीहरुलाई नेपाल फेन्सिङ संघका महासचिब सुजनलाल श्रेष्ठ, कोषाध्यक्ष एवं जुरी हेड अनुप कपाली, पोखरा उद्योग बाणिज्य संघकी महासचिव शोभा गौतम, गण्डकी फेन्सिङ संघका अध्यक्ष विजय शाही, प्रतियोगिताका संयोजक महेश पौडेललगायतले ट्रफी, मेडल तथा प्रमाणपत्र वितरण गरेका थिए ।
प्रतियोगितामा आयोजक गण्डकी प्रदेशसहित दुई विभागिय टोली नेपाल आर्मी क्लब र शसस्त्र प्रहरीको एपिएफ क्लब, बाग्मती प्रदेश, कोशी प्रदेश र सुदुर पश्चिम प्रदेशको सहभागिता हुने छ । कुल १ सय ७० जना खेलाडी र अफिसियलहरुको सहभागिता रहेको गण्डकी प्रदेश फेन्सिङ संघका अध्यक्ष विजय शाहीले जानकारी दिए ।
