बलिउड अभिनेत्री दीपिका पादुकोण र अभिनेता रणवीर सिंह आमाबुबा बनेका छन्।
भारतीय सञ्चारमाध्यम इन्डिया टुडेका अनुसार दीपिकाले आइतबार छोरीलाई जन्म दिएकी हुन्। दीपिकालाई शनिबार दिउँसो मुम्बईको गुरगाउँ क्षेत्रस्थित एचएन रिलायन्स अस्पतालमा भर्ना गरिएको थियो। यसअघि ६ सेप्टेम्बरमा दीपिका श्रीमान रणवीरसँग सिद्धिविनायक मन्दिर पुगेकी थिइन्।
दीपिकाले यसैवर्ष फेब्रुअरी २८ मा सामाजिक सञ्जालमार्फत गर्भावस्थाको घोषणा गरेकी थिइन्।
दीपिका र रणवीरले सन् २०१८ मा विवाह गरेका थिए। उनीहरूको पहिलो भेट फिल्म 'गोलियों की रासलीलाः रामलीला' को सेटमा भएको थियो।
दीपिका र रणवीरले 'रामलीला' बाहेक 'पद्मावत', 'बाजीराव मस्तानी' र '८३' मा सँगै काम गरिसकेका छन्। रणवीरको फिल्म 'सर्कस' मा दीपिकाले क्यामियो गरेकी थिइन्।
