हिमालय एयरलाइन्सले पोखरा अन्तर्राष्ट्रिय विमानस्थलबाट नियमित उडान सुरू गरेको छ।
एयरलाइन्सले सोमबार (आज)देखि पोखरा–ल्हासा अन्तर्राष्ट्रिय उडान सुरू गरेको हो।
पोखरा विमानस्थल कार्यालयका महाप्रबन्धक प्रेमनाथ ठाकुरका अनुसार एक सय सात जना यात्रु बोकेर ल्हासाबाट आएको हिमालयको जहाज दिउँसो पौने दुई बजे पोखरा विमानस्थलमा अवतरण भएको हो।
यससँगै हिमालय पोखरामा नियमित अन्तर्राष्ट्रिय उडान थाल्ने पहिलो वायुसेवा कम्पनी समेत बनेको छ।
यो जहाज भोलि बिहान ८:२० बजे ल्हासाका लागि उड्नेछ।
यससँगै हिमालय एयरलाइन्सको जहाज अब हरेक सोमबार ल्हासाबाट पोखरा आउनेछ र मंगलबार पोखराबाट ल्हासाका लागि उड्ने तालिका रहेको छ।
हाल हिमालय एयरलाइन्ससँगै चिनियाँ वायुसेवा सिचुवान एयरलाइन्सले पनि सातामा एउटा चार्टर्ड उडान गरिरहेको छ।
हिमालय एयरलाइन्सले भने नियमित उडान थालेको हो। आगामी दिनमा यात्रु संख्या बढेमा यसलाई विस्तार गरिने एयरलाइन्सले जनाएको छ।
