अन्तिम पटकका लागि थप गरिएको म्यादमा पनि ठेकेदारले निर्माण गर्न नसक्दा संघीय संसदको नयाँ भवन अलपत्र परेको छ।
सिंहदरबार परिसरभित्र संघीय संसदको बैठक भवन र सचिवालयसहित १२ वटा भवन हाल निर्माणाधीन छन्। तर चौथो पटक थप गरिएको समयमा पनि ठेकेदारले काम नगरेर म्याद गुजारेको हो।
सहरी विकास तथा भवन निर्माण विभागका आयोजना प्रमुख सुनिलकुमार ठाकुरले चैत १८ गतेबाट ठेकेदारको म्याद गुज्रिएको बताए।
भवन निर्माणको ८६ प्रतिशत काम सकिएको छ।
‘एयर कन्डिसन, फायर फाइटिङको काम बाँकी छ,’ ठाकुरले भने, ‘सिभिल तर्फको काम ९५ प्रतिशत काम सकिएको छ।’
भवनको भौतिक निर्माणको काम अन्तिम चरणमा पुगेको भए पनि अझै पनि बैठक सञ्चालनका लागि आवश्यक इन्टेरियर डिजाइन, माइक लगायतका कन्फ्रेन्स सिस्टमको काम बाँकी छ। ती कामका लागि उपकरण खरिद प्रक्रिया बल्ल सुरू हुन लागेको उनले बताए।
१२ वटा भवनमध्ये मुख्य भवनको डोमको छानाको काम अझै सकिएको छैन।
ठाकुरका अनुसार फलामको ट्रस निर्माण सम्पन्न भए पनि छाना छाउने काम बाँकी रहेको बताए। छाना छाउने कामका लागि अर्को कम्पनी भएकाले उसको सामान एक साताभित्र आइपुग्ने सूचना आफूहरूलाई दिइएको ठाकुरले बताए।
ठेकेदार कम्पनीले अझै निर्माण सम्पन्न गरेर भवन बुझाउन ६ महिनाको समय मागेको ठाकुरले बताए।
भवन निर्माणको ठेक्का तुँदी सेक ज्वाइन्ट भेन्चरले पाएको छ।
‘म्याद थप गर्न हामीलाई अप्ठ्यारो छ,’ ठाकुरले भने, ‘अघिल्लो पटक म्याद थप गर्दा अन्तिम पटक भनेर लेखिएको रहेछ। त्यसैले यस पटक हामीले म्याद थप गर्न मिल्ने/नमिल्ने विषयमा कानुनविद्हरूसँग छलफल गर्दैछौँ।’
ठाकुरले विभागसँग अब ठेकेदारलाई जरिवाना तिराएर काम लगाउने अथवा ठेक्का तोडेर जाने विकल्प रहेको बताए।
तर ठेक्का तोडेर जान सहज नरहेको उनले बताए।
‘अर्को आएर काम गर्न सक्ने अवस्था छैन। किनभने पाइपहरू सबै निर्माण गर्ने कम्पनीले बिछ्याएको हुन्छ। नयाँ कम्पनी आयो भने उसलाई कहाँ छ पाइपहरू थाहा पाउन पनि मुस्किल हुन्छ,’ ठाकुरले भने, ‘कुन तार कहाँबाट कहाँ निकाल्ने हो भन्ने थाहा पाउन नसक्ने अवस्था हुन्छ। जटिलता पनि छ।’
उनले नेपालमा संसद भवनको जस्तो परियोजनाको अनुभव नभएकाले पनि समस्या भएको बताए।
‘यत्रो ठूलो भवन नेटवर्किङ गर्नुपर्ने १२ वटा संरचना निर्माण गर्नुपर्ने जस्तो काम अहिलेसम्म भएको छैन,’ ठाकुरले भने, ‘ढिला धेरै भयो। भारतले संसद भवन निर्माण गरेर सञ्चालन ल्याइसक्यो।’
उनले निर्माण व्यवसायीलाई डाकेर छलफल गरेर अघि बढ्ने तयारीमा सहरी विकास मन्त्रालय रहेको बताए। तर ठेकेदार कम्पनीले पछिल्लो ६ महिनामा खासै काम नगरेकाले समस्या भएको ठाकुरले बताए।
‘ठेकेदारको कुरा बाहिरबाट सामान मगाइएको तर नआएको भन्ने छ,’ ठाकुरले भने, ‘सिसाका सामानहरू भारतबाट आउन ढिला भएको भनेर उसले कागजात देखाउँछ। तर सामान आइपुगेको छैन।’
सिंहदरबारको पुतली बगैँचा रहेको ठाउँमा १७३ रोपनी क्षेत्रमा संघीय संसद भवन निर्माणको काम अहिले अलपत्र परेको छ। ६ अर्बभन्दा बढी रकम खर्च गरेर निर्माण भइरहेको छ। २०७६ असोज १ गते प्रधानमन्त्री केपी शर्मा ओलीले भवनको शिलान्यास गरेका थिए। तर पाँच वर्ष नाघिसक्दा पनि भवन निर्माणको काम सम्पन्न हुन सकेको छैन।
-ink-1736760834.jpeg)
