बाजुराको जगन्नाथ गाउँपालिका–६ काप्री गाउँका सथनीयले परम्पराका नाममा एउटा गाईमाथि ढुंगा र लठ्ठीले हानेर क्रुर व्यवहार गरेको युवाको खोजीमा प्रहरी परिचालन भएको छ।
बाजुराका प्रहरी प्रमुख डिएसपी दिलीपकुमार गिरीले गाईलाई निर्मम रूपमा कुटपिट गर्दै कर्णाली नदी पार गराउन खोज्ने समूहको पहिचान भइसकेको हुँदा खोजीका लागि प्रहरी परिचालन गरिसकेको बताए।
‘गाईलाई लाठी र ढुंगा हान्दै जबरजस्ती कर्णाली नदीमा हाल्नेहरूको पहिचान भइसकेको छ,’ उनले भने, ‘प्रहरी खोजीका लागि मूभ भइसकेको छ, आजै उनीहरूलाई खोजेर ल्याइने छ।’
घटनास्थल प्रहरी कार्यालयदेखि झन्डै पाँच घन्टाको दुरीमा रहेको हुँदा प्रहरी पुग्न केही समय लाग्न सक्ने उनले बताए।
‘त्यहाँ मलामी त एक डेढ सयको संख्यामा हो भन्ने छ,’ उनले भने, ‘गाईलाई ढुंगाले हान्नेहरू आठदेखि नौ जना देखिएका छन् र तीमध्ये चार पाँच जना पहिचान भइसकेका छन्।’
ती व्यक्तिहरू गाउँ घरतिरै रहेको भन्ने खुलेको हुँदा प्रहरी परिचालन गरिएको उनले बताए।
ती व्यक्तिहरूलाई पक्राउ गरी ल्याइसकेपछि छलफल हुने उनले बताए।
नेकपा एमालेबाट निर्वाचित वडाध्यक्ष धनबहादुर सार्कीका अनुसार साउने सार्कीको मृत्यु लगत्तै अघिल्लो दिन मात्रै कालीकोटबाट दान गर्नका लागि गाई खोजेर ल्याइएको बताए।
परम्परा अनुसार गाईलाई जति प्रयास गर्दा पनि ‘पारिका’ नदी पार गराउन नसकेपछि स्थानीय फर्किएर घर आएको केहीबेरमै गाई पनि बेलुकी घर फर्किएको वडाध्यक्ष सार्कीले बताए।
स्थानीय चौकीबाट आएका प्रहरीले गाईको फोटो खिचेर लगेको र गाई सकुशल रहेको पनि उनले जानकारी दिए।
‘त्यो दिन म पनि मलामी गएको थिएँ,’ उनले भने, ‘म पालिकाको बैठक भएको हुँदा केहीबेर बसेर बिदा मागेर कार्यालय फर्किएपछि त्यो घटना भएको रहेछ।’
वडाध्यक्ष हुनुको नाताले गाईमाथि भएको क्रुर व्यवहारको जिम्मा आफ्नै भएको तथा सामाजिक रूपमा चेतना फैलाउन नसक्नु आफ्नो कमजोरी रहेको भन्दै आफू पनि सजाएको भागिदार भएको स्वीकार गरे।
‘मैले कुरिती, कुसंस्कार र छुवाछूतको बारेमा जति सामाजिक रूपमा चेतना फैलाउन ध्यान दिनु पर्थ्यो त्यो गर्न सकिनँ कि! भन्ने महसुस भएको छ,’ उनले भने, ‘सामाजिक परम्परा र मान्यताहरू रहे पनि कानुनभन्दा माथि कोही हुँदैन। अब यो घटनामा कानुले जे भन्छ, त्यही गर्नुपर्छ र दोषी भए म पनि सजाएको लागि तयार छु।’
उनले बुढापाकाहरूको पछि लाग्दा परम्परा धान्ने नाममा गलत हुन पुगेको र त्यसले गर्दा अहिले गाउँमा समस्या आइलागेको बताए।
‘पुरानो रितिरिवाज र चलनचल्तीका गलत कुराहरू बुझाउन नसक्दा समस्या आइलाग्यो,’ उनले भने, ‘एकै दिन वा रातमा गलतै भए पनि परम्परा भत्काउन गाह्रो रहेछ। मलाई लाग्छ अब पुरानो पुस्ता सकिएपछि मात्रै यस्ता गलत प्रचलनहरू क्रमश: हट्ने छन्।’
परम्पराका नाममा गलत कुराहरू त्याग्नुपर्छ भनेर सम्झाउन खोज्दा पनि पुराना पुस्ताले विरोध गर्ने गरेका कारण समस्या भइरहेको उनले बताए।
‘मानिसको मृत्युपछि गाईलाई नदीमा हालेर पारिका तार्ने पहिलको चलन हो,’ उनले भने, ‘आजको आधुनिक समाजमा त्यस्ता कुराहरू चिर्दै अघि बढ्नु पर्छ भन्ने कुरामा युवाहरू सहमत भए पनि बुढापाको परम्परा धान्ने नामा यो सबै भएको हो।’
यो पनि
परम्परा धान्ने नाममा बाजुरामा गाईमाथि क्रूर व्यवहार (भिडिओ)
कर्णालीमा हेलिएको गाई फर्कियो घर
