नेपाल प्रहरीका केन्द्रीय प्रवक्ता तथा डिआइजी दिनेश आचार्यले तीनकुने घटनामा पछाडिबाट गोली लाग्ने कोही नभएको बताएका छन्।
तीनकुने घटनामा तीन जनालाई गोली लागेकामा कसैलाई पनि पछाडिबाट नलागेको उनले बताए।
'पछाडिबाट गोली लाग्ने मान्छे छैनन्। पछाडिबाट लागेर अगाडि निस्किएका पनि कोही छैनन्। अगाडि नै लागेको हो,' उनले भने, 'जुन घटनामा सविन महर्जनलाई गोली लागेको भनिएको छ, उनको पछाडि गोली लागेको प्वाल नै छैन। अगाडि मात्रै लागेको छ।'
अहिले भाइरल भइरहेको भिडिओ क्लिप छोटो रहेको र त्यसले त्यहाँको सबै सन्दर्भ र अवस्था प्रस्ट नहुने पनि उनले बताए।
'केही मिनेटको क्लिपले त्यहाँ भएको समग्र घटना प्रस्ट्याउँदैन,' उनले भने, 'पछाडिबाट गोली लाग्यो भनिएको जुन कुरा छ, त्यो होइन।'
उनका अनुसार तीनकुने घटनामा तीन जना व्यक्ति गोली लागेर घाइते भएका थिए। तीमध्ये दुई जना अझै वीर अस्पतालमा उपचाररत छन्। कीर्तिपुरका सविन महर्जनको छातीमा गोली लागेको हो। उनको उपचार क्रममा मृत्यु भएको थियो।
वीर अस्पतालको आइसियूमा उपचाररत घाइतेहरू शम्भु दर्जी र डिल्लीप्रसाद लुइँटेल हुन्। डिल्लीप्रसादको पेटमा र दर्जीलाई कुममा गोली लागेको डिआइजी आचार्यले जानकारी दिए।
अहिले बाहिर आएको भिडिओ क्लिपको वास्तविकताबारे आन्तरिक रूपमा बुझ्ने काम भइरहेको उनले बताए। प्रहरीले एम्बुलेन्स चालकसँग पनि सोधपुछ गरेको छ।
'त्यहाँ गोली लाग्ने व्यक्ति सविन नै हुन् कि होइनन् भनेर हामी बुझिरहेका छौं। भिडिओ खिच्ने मान्छेले भुँडीमा गोली लागेको भनेका छन्। रेकर्डमा त्यस्तो सुनिन्छ तर वास्तवमा सविनको त्यो होइन। पेटमा गोली लागेका व्यक्ति वीर अस्पतालमा उपचाररत छन्,' उनले भने।
सम्पादकीय: तीनकुनेमा प्रदर्शनकारीलाई पछाडिबाट गोली हानेको भनिएको घटना तुरून्त छानबिन गर
-1743415477.jpg)
