काठमाडौंको तीनकुनेमा भएको प्रदर्शनमा राष्ट्रगान बजिरहँदा अश्रुग्यास प्रहार भएको भिडिओ ‘डिपफेक’ भएको प्रहरीले बताएको छ।
बुधबार पत्रकार सम्मेलन गर्दै प्रहरीका केन्द्रीय प्रवक्ता डिआइजी दिनेश आचार्यले उक्त भिडिओ डिपफेक भएको बताएका हुन्।
‘आज हामीकहाँ आएको के हो भने प्रहरीले अनावश्यक बल प्रयोग गर्यो भन्ने कुरा हो। प्रहरीले कार्यक्रम बिथल्यो भन्ने कुराहरू जुन हिसाबले आएको छ। प्रहरीले वास्तवमा सुरू गरेकै छैन। उहाँहरूले कार्यक्रम सुरू हुनुभन्दा अगाडि नै हो,’ उनले भने, ‘त्यहाँ कुनै राष्ट्रगान बजेको छैन। फेक, डिपफेक भिडिओ हुन्। त्यहाँ कार्यक्रम नै सुरू भएको छैन कसरी राष्ट्रगान बज्छ?’
त्यसो हुनुअघि नै एक जना व्यक्तिले मञ्चबाट भाषण गरेर बानेश्वरतर्फ जानुपर्ने बताएको पनि उनले बताए।
यद्यपि स्टेजमाथि भने अश्रुग्यास पुगेको हुनसक्ने बताए।
कार्यक्रम सञ्चालन गर्ने व्यक्तिले भीडलाई बानेश्वरतर्फ पठाएपछि प्रहरीले अश्रुग्यास प्रहार गरेको र त्यतिबेला पुगेको हुनसक्ने उनले बताएका हुन्।
