मानव बेचबिखन कसूरमा १० वर्ष कैद सजाय तोकिएको फरार भएकी एक महिला पक्राउ परेकी छन्।
इलामको माई नगरपालिका-७ घर भई काठमाडौं टोखा नगरपालिका-९ बस्ने २८ वर्षीय चिनीमाया लिम्बू भनिने चिनमाया लामा लिम्बू पक्राउ परेकी हुन्।
उनलाई टोखा नगरपालिका-९ बाट मानव बेचबिखन अनुसन्धान ब्युरोको टोलीले बिहीबार पक्राउ गरेको हो।
उनलाई नियन्त्रणमा लिएर कैद भुक्तानीका लागि जगन्नाथदेवल कारागार पठाइएको ब्युरोका एसपी नरेन्द्र कुँवरले जानकारी दिए।
उनलाई होटलमा बालिकालाई राखेर जबरजस्ती यौन व्यवसायमा लगाएको आरोपमा २०७९ असार ३० गते पक्राउ गरिएको थियो। पक्राउ गरिएको १७ दिनमा दुई लाख रूपैयाँ धरौटी बुझाएर छोडिएको एसपी कुँवरले जानकारी दिए।
'२०८१ मंसिर ५ गते उनलाई जिल्ला अदालत काठमाडौंले मानव बेचबिखन तथा ओसारपसार कसुरमा १० वर्ष कैद र ५० हजार रूपैयाँ जरिवाना तोकेको थियो,' उनले भने, 'त्यतिबेला देखि नै उनी फरार थिइन्।'
