चैत १५ गते काठमाडौंको तीनकुनेमा भएको हिंसात्मक आन्दोलनमा संलग्न रहेको आरोपमा पक्राउ परेका व्यक्तिहरूको सरकारी वकिलको कार्यालय काठमाडौंमा बयान लिने काम भइरहेको छ।
सरकारी वकिलको कार्यालय काठमाडौंले दिनहुँजसो प्रतिवादीहरूसँग बयान लिइरहेको हो।
जिल्ला प्रहरी परिसर काठमाडौंले अहिलेसम्म ८२ जनालाई मुद्दा चलाउने गरी जिल्ला अदालत काठमाडौंबाट म्याद थप गरेको छ।
राज्यविरूद्धको कसुर, संगठित अपराध र आपराधिक उपद्रव कसुरमा ती प्रतिवादीहरूमाथि प्रहरीले अनुसन्धान थालेको हो। कतिपय व्यक्तिहरूको अझै खोजी भइरहेको परिसरका प्रवक्ता एसपी अपिलराज बोहराले जानकारी दिए।
‘पछिल्लो समय थप पक्राउ परेका छैनन्। अहिले ८२ जनामाथि अनुसन्धान भइरहेको छ,’ उनले भने।
८ जनालाई प्रहरीले हाजिर जमानीमा राखेर अनुसन्धान गरेको छ। उनीहरूलाई प्रहरीले बोलाएको बेला आउने गरी छाडिएको हो।
७४ जना भने प्रहरीकै हिरासतमा छन्।
‘उनीहरूमध्ये पनि कतिपयको बयान भएको छ। कतिपयको बयान लिनेक्रममा छ र कतिको प्रमाण संकलनकै चरणमा पनि छ,’ एसपी बोहराले भने।
सरकारी वकिल कार्यालयका प्रवक्ता एवं जिल्ला न्यायाधिवक्ता गोकुलबहादुर निरौलाका अनुसार प्रतिवादीहरूको बयान लिने क्रम जारी नै छ।
अहिलेसम्म २५ जना जतिको बयान लिइसकेको उनले बताए।
‘यो मुद्दामा बयान लिने काम भइरहेकै छ। २५ जना जतिको बयान भयो होला। अरूको पनि बयान धमाधम भइरहेको छ,’ उनले भने।
राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्र, महामन्त्री एवं सांसद धवलशमशेर राणा र आन्दोलनका 'कमाण्डर' दुर्गा प्रसाई पनि प्रहरी हिरासतमा छन्।
मिश्र र राणालाई काठमाडौं उपत्यका अपराध अनुसन्धान कार्यालयको टोलीले चैत १५ गते राति नै पक्राउ गरेको थियो। त्यसबेला दुर्गा प्रसाईं फरार थिए।
प्रहरीको विशेष ब्युरोले चैत २८ गते राति प्रसाईंलाई भारतको असमस्थित बक्सा जिल्लाबाट पक्राउ गरी नेपाल ल्याएको थियो।
प्रसाईंको पनि बयान भने भइसकेको छैन। रवीन्द्र, धवल र दुर्गामाथि अनुसन्धान भइरहेकोले बयान भइसकेको छैन।
‘तीन जना अनुसन्धानकै क्रममा छन्, अन्य व्यक्तिहरूको बयान भइरहेको छ,’ उनले भने।
त्यस घटनामा संलग्न अधिकांश भिडिओ प्रमाण भएकाले उनीहरूले स्वीकार गर्ने गरेको पनि न्यायाधिवक्ता निरौलाले बताए।
‘धेरैको फोटो भिडिओ नै प्रमाण भएकाले केही गरेको होइन भन्न सक्नेहरू छैनन्। कतिपयले लहैलहैमा लागेर गएको हुँ पनि भनेका छन्,’ उनले भने।
दुर्गा, रवीन्द्र र राणा राखियो बेग्लाबेग्लै कोठामा
रवीन्द्र, धवल र दुर्गालाई जिल्ला प्रहरी परिसर काठमाडौंकै हिरासत कक्षमा राखिएको छ।
अहिले प्रहरीको हिरासतमा यही मुद्दाका मात्रै ७४ जना छन्। अन्य मुद्दाका प्रतिवादीहरू पनि त्यही राखिएको छ।
नयाँ बनेको परिसरको भवनमा ३३० जना क्षमताको हिरासत कक्ष छ।
अन्यलाई विभिन्न कक्षमा व्यवस्थापन गरेर राखिएको भए पनि तीन जनालाई भने अलगअलग राखिएको एसपी बोहराले बताए।
‘हाम्रो यहाँको भवनमा हिरासत कक्ष पनि ठूलै छ। अहिले तीन जनालाई अलगअलग राखेका छौं,’ उनले भने।
प्रहरीले राज्यविरूद्धको कसुरमा २२ जनालाई हिरासतमा राखेको छ। बँकीलाई आपराधिक उपद्रव कसुरमा अनुसन्धान भइरहेको हो।
यी हुन् प्रहरीले म्याद थपेका ८२ जना
राज्यविरूद्धको कसुर:
रवीन्द्र मिश्र, धवलशमशेर राणा, दुर्गा प्रसाईं, उनका अंगरक्षक दीपक खड्का, गोपाल मल्ल, गोपीकृष्ण खड्का, सन्तोष चौधरी, रामकुमार धिमाल, पशुपति खड्का, हरिहर चौलागाई, विष्णु पराजुली, धर्मगुरू बताउने पुस्कर खतिवडा, मुनिन्द्रराज भण्डारी, कुमार बस्नेत, अनिलकुमार थापा, तारानाथ बोहरा, दानबहादुर न्यौपाने, उमेश तामाङ, भानुभक्त पौडेल, विष्णुजंग बस्नेत, देवीप्रसाद संग्रौला र प्रेम थापा प्रहरी हिरासतमा छन्।
आपराधिक उपद्रव गर्न नहुने कसुरमा पक्राउ परी हाजिर जमानीमा रहेका:
देवबहादुर थापामगर, राज ठाकुर, प्रसिद्ध मल्ल, नवीन ढकाल, आलोक पराजुली, चित्रमाया बस्नेत, सस्मिता बराल र बरण यादव हाजिर जमानीमा छन्।
हिरासतमा रहेका ६० जना:
विकास ओली, सुदर्शन थापा, ईरफान खान, गणेशबहादुर गुरूङ, विवेक खनाल, उपेन्द्र शाह, कृष्णकुमार बस्नेत, जिवन पुरी, गणेश प्याकुरेल, शरून थापा, श्रवण लामा, निराजन गिरी, प्रेधबहादुर श्रेष्ठ, राजकुमार राई, भगवती रोक्का, मनिषकुमार शाही, स्टन लामा, शुसिला कुमाल, निर्मला कार्की, एलिसा राई, भविन्द्र बिसी, आशिस तामाङ, लिलत राणा, लोकबहादुर बस्नेत र सरिपता केसीमाथि आपराधिक उपद्रव गरेको आरोप छ।
त्यस्तै सितादेवी राई, रवि रञ्जनकुमार सिंह, आशिषकुमार महतो, प्रेमकुमार सिंह, राधेश्याम यादव, गोविन्द्र राय, दिनेश खड्का, समिर मगर, सुरेश गौतम, सुशिल बराल, रमेश राई, गोकर्ण शाही, मुकुन्द दाहाल, केशव बस्नेत, अमित शाह, सुमन कार्की, हेमराज थारू, दिवस बोगटी क्षेत्री, अनिता कुँवर, कुमार तामाङ, दिलकुमार श्रेष्ठ, जितबहादुर श्रेष्ठ, डण्डापाणी रेग्मी, कमलकुमार विष्ट, शिशिर जिसी, मनोजकुमार सापकोटा र रञ्जित बस्नेत पनि हिरासतमा छन्।
-1744710956.jpg)
