त्रिभुवन विश्वविद्यालयको निमित्त उपकुलपतिको जिम्मेवारी प्रा.डा. खड्ग केसीले पाएका छन्।
प्रधानमन्त्रीसमेत रहेका कुलपति केपी शर्मा ओलीले मंगलबार शिक्षाध्यक्ष केसीलाई निमित्त उपकुलपतिको जिम्मेवारी दिएको प्रधानमन्त्रीको सचिवालयले जनाएको छ।
‘त्रिवि उपकुलपतिको अर्को व्यवस्था नहुन्जेलसम्मका लागि शिक्षाध्यक्ष केसीलाई उपकुलपतिको जिम्मेवारी तोकिएको’ हो। त्रिविमा बढीमा तीन महिनासम्म निमित्त उपकुलपति राख्न मिल्छ।
यसअघिका उपकुलपति प्रा.डा. केशरजंग बरालले पदबाट राजीनामा दिएपछि त्रिवि उपकुलपति पद रिक्त थियो। कुलपति ओलीले चैत २८ गते उपकुलपति बरालको राजीनामा स्वीकृत गरेका थिए।
