सुनसरीमा गए राति गाँजा तस्करी गर्ने समूहले गोली चलाएको खुलेको छ।
सोमबार बेलुकी करिब साढे ८ बजेतिर देवानगन्ज गाउँपालिका-७ मा तीन राउण्ड गोली चलेको थियो।
मोटरसाइकल चढेर जाँदै गरेका दुई जनामाथि गोली प्रहार भएको हो।
गोली लागेर सोही पालिकाका शिवकुमार मेहता र रविनकुमार यादव घाइते भए।
शिवकुमारको विराटनगरस्थित नोबेल अस्पतालमा उपचार भइरहेको छ। रविनकुमार सामान्य रहेकाले प्रहरीले उनलाई नियन्त्रणमा लिएको छ।
जिल्ला प्रहरी कार्यालय सुनसरीका एसपी सुमन तिमल्सिनाका अनुसार यस घटनामा थप एक जनालाई पक्राउ गरी अनुसन्धान भइरहेको छ।
यसमा अन्य तीन जना फरार रहेकाले खोजी भइरहेको छ। प्रहरीले गए राति घटना भएपछि पिन्टु यादवलाई पनि पक्राउ गरेको थियो।
‘६ जनाको संलग्नता देखिएको छ, अहिले अनुसन्धानकै क्रममा छौं। दुई थरी कुरा आएको छ। तर उनीहरू एउटै समूहका साथीहरू थिए,’ उनले भने।
घटनामा संलग्न व्यक्तिहरू सीमावर्ती क्षेत्रमा गाँजा लगायत लागुऔषध तस्करी गर्ने समूह रहेको एसपी तिमल्सिनाले बताए।
पहिले एउटै समूहमा बसेर तस्करी गर्दै आएका उनीहरूबीच पछिल्लो समय विवाद उत्पन्न भएपछि गोली प्रहारको अवस्था आएको उनले बताए।
‘पिन्टु एउटा समूह भयो। अर्को रविनकुमारको भयो। यसरी दुइटा समूहबीच विवाद भएको हो,’ उनले भने।
अहिले दुई वटा कारणहरू खुलेका छन्। तर त्यसमा भेरिफाइ गर्ने काम भइरहेको पनि उनले बताए।
एक जनाले गाँजा कारोबार गर्नेक्रममा लेनदेन नमिलेको प्रारम्भिक बयान दिएका छन्।
अर्काले भने एक लाख रूपैयाँको विवाद भएको पनि बताएका छन्। यद्यपि यसबारे फरार रहेका व्यक्तिहरूलाई पक्राउ गरेपछि थप खुल्ने प्रहरीले जनाएको छ।
हाल पक्राउ परेकाहरूमाथि म्याद थप्ने प्रहरीको तयारी छ। रविनकुमार एक महिनाअघि मात्रै गाजाँ तस्करीकै मुद्दामा धरौटी बुझाएर छुटेको खुलेको छ। अन्यको पनि आपराधिक पृष्ठभूमि खोज्ने काम भइरहेको प्रहरीले जनाएको छ।
गए राति सुनसरीमा तीन राउण्ड गोली प्रहार भएको थियो। तीन वटा खोका प्रहरीले घटनास्थलबाट बरामद गरेको छ।
