प्रधानमन्त्री कप महिला राष्ट्रिय टी-२० क्रिकेट प्रतियोगितामा सशस्त्र प्रहरी बलको एपिएफ क्लबले लगातार जित निकालेको छ।
कैलालीको धनगढीस्थित फाप्ला मैदानमा बुधबार एपिएफले गण्डकी प्रदेशमाथि ८ विकेटको जित निकाल्यो। अघिल्लो दिन एपिएफले कर्णालीलाई १११ रनले हराएको थियो।
गण्डकीले दिएको ७१ रनको लक्ष्य एपिएफले ९.३ ओभरमा २ विकेट गुमाएर पूरा गर्यो। एपिएफकी कप्तान इन्दू बर्माले २६ रन र रोमा थापा १४ रनमा नटआउट रहे।
त्यसअघि राजमती ऐरी ८ रन र ममता चौधरी १४ रनमा आउट भएका थिए।
हुस्सुका कारण १५ ओभरमा झारिएको खेलमा टस जितेको एपिएफले फिल्डिङ रोजेपछि पहिले ब्याटिङ गरेको गण्डकीले ५ विकेटको क्षतिमा ७० रन बनाएको थियो।
उसका लागि ओपनर तथा कप्तान सिर्जना पौडेलले रनआउट हुनुअघि २५ रन बनाइन्।
बलिङमा एपिएफकी बिनु बुढाले २ विकेट लिइन् भने करुणा भण्डारीले १ विकेट आफ्नो नाममा लेखाइन्।
